Geebu desex喇!

尋日同geebu去desex, 之前一路都冇乜擔心. 一黎好多貓友對dr. maggie 既評價都好好, 同埋呢個都唔係大手術. daddy由於出trip去左杭州, 今次由mammi 做project manager! 只係到左手術前一晚, 我就開始緊張喇. 又驚佢會肚餓啦 (因為手術前12個鐘唔食得野), 又驚佢會唔知o係邊搵到野食啦(因為我呢度係open kitchen), 又驚自己唔知醒啦, etc etc.. 為左令geebu安心少少, 前一晚就拎左個貓袋出黎, 佢都唔知幾開心, 又出又入咁.

手術o個朝早, 我就成屋走黎走去準備geebu 貓袋, 針card, 毛巾等等既野. 貓袋入面放左一條毛巾, 我o係 office用既scarf (因為發現佢好鐘意呢條scarf, 借住俾佢先啦), 同埋一個毛毛波 (佢一發癲或者發脾氣就會拎個毛毛波黎出氣, 所以放定入去).


(圖按: 出返前, 玩得勁開心, 個肚仲有好多毛. o個幅畫係geebu 媽媽既大作)

帶左佢上dr. maggie度, 我就行返公司. 一整日o係office都好掛住geebu, 想快d帶佢返屋企. 一到6點我就走喇, 接返geebu後, 就去搭船啦, 一路上都好小心, 好驚會整親佢, 返到屋企, 收拾好晒d危險品, 就放左geebu出黎喇. 佢有小小"支力", 用左十分鐘o係屋頭屋尾行左幾個圈, 好似安心返d, 跟住就急急腳去厠所, 去左好耐呀.....

出返黎就飲左好多水, 俾乾糧佢食佢又唔多"so" d乾糧... 見佢咁耐未食野, 俾左少少濕糧佢食, 咁佢d食慾就返晒黎...


(圖按: 返到黎, 迷惘... geebu:"呢度係邊度黎架...")

夜晚睇下佢個傷口, dr. maggie手勢好好, 個傷口真係幾細, 同之前有位貓友post o個個差唔多(1.3cm!).


(圖按: 傷口. d肚毛毛冇晒lu...)


(圖按: 傷口)


(圖按: 雖然"支力"不過精神都算ok)

不過另外發現, d指甲俾人剪左好多, 有一隻仲剪到過晒粉紅色o個度, 有血跡. 我平時同佢剪得密(兩星期一次), 但係都唔會剪得咁勁, 點都會留返d, 所以我幾肯定唔係我剪到佢咁. 好心痛呀, 要佢走去挨一刀已經好慘, 仲見到隻指甲流血咁.... 希望好似steven哥哥咁講, 過一兩個禮拜生返長啦...

今日geebu都算幾精神, 不過訓得多d, 冇暴走, 同埋睇得出去跳上跳落都就住. 傷口呢, 就咁睇好似埋左口咁. 希望過多一兩日佢會變返活潑啦.